上一集講到，有球員係名成之後，就會選擇出掘金；亦有一些球員會選擇一生忠心於孕育自己的球會，也有一些為了現時球會的名譽而留底，續繼拼命。依幾種球員既情況，相信大家都能夠接受，上集講掘金既伊度奧，佢係歐洲球壇、世界球壇，所攞到既榮譽真係數之不盡，係自己全盛既時期一直係大賽場打滾，到依加三十歲多，感覺自己開始走下坡，就去俄羅斯聯賽掘金，全個職業生涯既選擇都合理非常。
相信有睇2010 年既南非世界盃既朋友仔，都應該好認得上圖入面既依塊面孔。無錯，佢就係加納隊既基恩艾沙莫。是屆世界盃，佢完全可以用發光發熱黎形容，優越既身體素質，熟爛既腳下功夫，有唔少單騎殺敵既場面，係佢既演出中睇得到；加納隊能夠殺入八強，佢既功勞就真係單天保至尊一樣，5場波入面，攻入左3球。
原本係意甲烏甸尼斯打滾既基恩，踼完世界盃之後，受到唔少球會垂青，不過最終佢選擇左以1400萬鎊轉會費加盟英超中游球會新特蘭。佢依個決定，我最初覺得有些少唔妥，以佢既級數，絶對能夠係任何勁旅生存。至於佢係新特蘭既生涯，亦都非常順利，係2010年英超球季，佢係英超既第一個球季，就能夠係34場入面，射入10球，仲奉上唔少助攻，實在唔係一般球員能夠做到。
其後，我睇番佢既轉會係在8月31日，轉會窗既最後一日完成，我諗應該係佢好渴望去曝光率更高既英超，先作出依個決定。
一個成功既球季過去了，基恩4 年既合約，如無強隊加盟，理應繼續係新特蘭發光發熱。不過，奇怪既事發生了，2010 球季完成後，一間阿聯酋球會艾恩，希望將基恩挖角，又係用高薪引誘佢過檔，只係26 歲既佢，前途一片光明，係足球生涯既成就一定唔會止於當時，但係有新聞報導，當時佢係同意轉會到艾恩，雖然最終新特蘭阻止左，以租借既形式轉去艾恩，希望12年球季再回巢，算係一點點勸阻加懲罰的意味，但所花上既，可是一年既光陰。
姑勿論基恩會否重番英超，再創高峰，但係依件事反映左，金錢有時真係一隻大魔鬼，相信基恩同意轉會艾恩，都係受唔住金錢既誘惑先致作出依個決定。雖然只係一年，但係返黎之後，能唔能夠保持頂級聯賽水準既質素都好令人懷疑。
筆者想交代既係，年青有為，係非常難得，唔好因為一時既慾望，放棄左將來，放棄左可能以後都唔再拎到既名譽，咁樣實在太短視。作為一個球迷，係大賽場上，少左一個好似基恩咁有天賦既球員，都係令我非常可惜。最後，希望基恩唔會因為今次事件，無左昔日光輝，來季重返英超，可以繼續用佢上乘既足球技術，為球壇帶來更多美好視覺吧！
沒有留言:
張貼留言