掘金？名譽？之上集

安歷卡加盟上海申花

身在安捷的伊度奧

       不少著名球員係職業生涯過左高峰期既時候，都會選擇到一些足球正在推行和發展的國家聯賽「掘金」，意思係該國家比較有錢既球會用高薪招引佢地，簡單D 講，就即係名成後利就，依靠自己多年係足球界打響既名堂，搵可能係人生中，一桶最大既金。上面兩個球員就係比較近期既例子，有「轉會皇」之稱既安歷卡，係多間球會取得成功之後，最後由車路士改投中國既上海申花，週薪高達 20萬英鎊，簡直係天文數字。再早少少既伊度奧，係強會巴塞同國米都雙雙取得成功，又拎過非洲足球先生，係上年夏季轉會窗，以200 萬鎊加盟俄羅斯新貴球會安捷，恐怖既週薪更高達 34.5萬鎊，冠絶全球，實在恐怖。

       由此可見，踼波踼到佢地依種世界級既水準，油水多到撈都唔愁撈；就正因為依個原因，亦都體現到金錢對每一個人既吸引力。

羅馬王子‧托迪

車路士鋒線老將杜奧巴

        不過，正所謂人各有志，掘金未必可以吸引到每一個球員。就好似球皇奧斯卡既一篇文章：《經典球員逐個捉──「羅馬王子」托迪披甲700場》，入面既主角托迪，出生地係羅馬，長大既地方都係，所屬既球會都係，至今從未效力過任何羅馬以外既球隊，以佢既實力，選擇當然多的是，球皇既文章入面提到佢係2001 拎過一次聯賽冠軍，當時皇馬同巴塞就以雙倍既人工誘惑佢轉會，佢坦言曾經心動，不過，佢既忠心可昭日月，至今佢就係羅馬效力左二十年之多。

        另一幅圖既主角杜奧巴，雖然我唔排除未來佢會去其他聯賽掘金。但重要既係，上海申花曾經係今季高薪引誘佢，仲打出安歷卡依張友情牌；不過，最終杜奧巴都係選擇暫時留隊，主因明顯都係想係歐洲大聯賽繼續增添一些榮譽，更渴望為愛隊車仔拼盡自己既精力，希望能夠拎番次歐聯冠軍。

        由此可見，名譽與忠誠，有時係一些球員心中既定位，會遠超金錢的。