史雲斯@Core Duo2

       睇左優格兒篇〈中場點兵錄－－雙核心打頭陣〉未呀？係咪對沙維同恩尼斯達依對巴塞中場雙核認識多左呢？依對左腦同右腦，唔係剩係西班牙先見到架！

       上次耳冬我咪講緊史雲斯係英超巴塞嘛，係踼法上面果種全面壓制真係好相似，但唔單單係咁樣，其實巴塞既雙核，史雲斯都有！沙維同恩尼斯達一向以傳 Key pass為名，加上佢地好高既傳球成功率，令到巴塞進攻水銀瀉地。至於史雲斯，係中場陣容方面，就有祖爾阿倫(Joe Allen)同埋利安比頓(Leon Britton)兩位大將。

     上圖白衫果位就係祖爾阿倫(Joe Allen)喇，係咪好靚仔呢?最令人注視既野就係1990-03-04 衣個日子。無錯，就係祖爾阿倫既牛一，佢仲細過筆者我，真係唔到你唔服，只係得二十二歲，前途真係無可限量，仲係史雲斯自家製既青訓。佢既踼法就似巴塞既恩尼斯達，一樣細細粒，但係謢球、控球既技術好高，能夠係盤球當中尋找機會，創造機會比其他隊友；佢既活動範圍很大，係來回敵我禁區既人，足見體能唔錯，主要活動地帶就係對方禁區頂至中場既位置左右，善於反搶，係史雲斯能夠係對方半場猜波既原因之一。佢既傳波就比較以地波為主，即係短傳滲透，一記妙傳就能夠造出唔少攻勢。係數據統計上，佢既傳球成功率達到87.5%，係本季出場多20場既英超中場球員入面，排起第四，係一個唔錯既成績啦！

      至於上兩圖白衫果位就當然係利安比頓(Leon Britton)啦！依位仁兄係英格蘭土炮，屬於韋斯咸既青訓，係02年借左黎史雲斯，03年就買斷埋，除左10年賣過比鍚菲聯之外，至今所有時間都係自由球場既中場核心。有小白，當然唔少得沙維，個樣仲有少少似添，佢就係史雲斯既另一大腦，主要司職防守中場，但就唔係馬基利尼果種單純防中，可以話係一個 Deep Lying Playmaker，類似派路果種，但係技術層面上，更似沙維，同樣係細細粒，仲要比沙維矮4CM，不過天生好勤力既佢，永遠都係全場奔走，尤其善於串連後防同前場，以及分邊兩側派牌，仲不時可以放一些中長距既妙傳入禁區，由後場發動攻勢，加上防守方面，佢效率比祖爾阿倫更高，成為左後防線前既一道屏障。數據統計方面，佢既傳球成功率更加達到92.6%，係本季出場多20場既英超中場球員入面最佳，但各位唔好誤會，佢既傳球唔似果陣阿記既「神丹」，只向橫/後傳，佢係會傳 Key pass既波，所以並唔係浪得虛名架！

      好啦！各位！今次就講到衣度先，下次耳冬再會同大家講下更多對英超既心得。