上面左方果幅，就係一心買入費托既車仔大老闆艾巴莫域治，雖然佢不斷干涉球會事務係唔好，但真係要多謝佢一直對車路士既金錢支持。佢買入費托，就好似買入當年既舒夫真高咁，變左膠刀，令人感嘆佢每次既水魚行為。不過，好多車迷包括我，都同油王一樣，即使困難重重，都一樣咁支持費王子，可能好似有啲朋友咁講，靚仔就係大曬，哈哈，無可否認，我係男仔都比佢個型樣吸引，希望佢可以係愛隊發光發熱。由佢加盟到三月初，佢只係入左五個正式比賽入球，足足25小時比賽時間，顆粒無收，只能回味開齋果一球，即係上面右方果幅，就係當時慶祝既情況。
 |
| 車仔新帥迪馬堤奧 |
 |
| 車路士4-1 贏拿玻里後情況 |
上一篇《潛龍勿用。藍色的曙光》講到，迪馬堤奧上任後，將死氣沉沉既車路士激活，成就左一番新景象，係歐聯反勝一役後，全隊都得以鼓舞，唯獨費王子係賽後，都好似上面果幅圖咁，笑唔出……
事關佢果場繼續啞火，又浪費左一次對方龍門失誤得來既機會，當然非常失望，因為佢不斷跑動、嘗試，卻無成果。賽前迪馬堤奧就曾經講過：「費托心理上有問題，只有他自己才能解決。假如他需要我，我會在他身邊給予支持；但很明顯，要改變事情還是靠他自己解決。首先，費托不可想著自己的身價有多高；還有，每次比賽不應只想著入球，專心比賽便足夠了。」足見迪馬堤奧對費托仍然信任，並能夠給予支持，可見係個對球員不離不棄既好主帥，跟保亞斯下課前，指舒夫真高係水貨等等言論諷刺，相形見拙。
講講下又好似講番迪馬堤奧咁，不過無錯，衣篇文章能夠動筆，唔多唔少都因為佢，因為佢激活番費托！
上面兩幅就係最近一場，係足總杯對陣李斯特城既圖片，費托係該場比賽貢獻左兩個入球同兩個助攻，氣勢一時無倆！之前既比賽，王子都努力改變，反搶、走位都非常勤力，一改以往利記既等波踼法，不過始於欠運未能入波，不過王子其實係助攻方面做得好好，以往只係入波既佢，如今助攻次數已經達到10 個，不亞於任何中場球員。
至於係李斯特城既爆發，始終都要多謝下主帥，就好似筆能所講：「整隊利物浦先穩守後依靠托利斯快速反擊撕破對方防線，然後取得入球。」今場比賽，迪馬堤奧擺出左4-2-3-1 既陣式，明顯落左Order 以費托做進攻支點，令到好多反擊傳球，第一時間就去到費托腳下，佢既速度優勢就出曬黎，第2球就係佢引開左敵方中堅班巴，傳左致命球比卡奴而得既。另外，今場迪馬堤奧將一直被保亞斯用作防守中場既美利拉斯推前至攻中位置，費托同佢衣對舊搭檔就番曬黎，下半場就係美利拉斯傳波入禁區，費托近柱射入。入左波定過神之後，費托又把握美利拉斯開出既一次角球機會頂入，佢既笑容終於番黎，作為球迷既我，真係好開心。其後，比賽末段，費托本來有個上演帽子戲法既機會，但佢見到美利拉斯個位置更好，毫不吝嗇咁助攻比衣位好搭檔。
雖然只係對英冠球隊既比賽，不過真係高興費托再次入球喇，除左入波，10個助攻既數字，係利記既佢未必做得到，唔知咁樣算唔算更進一步呢？By the way, 他終能將冰山劈開！
補充一點，係承繼上篇文章，當衣場足總杯既比賽完左之後，迪馬堤奧同傳媒講：「希望他的自信可以回升，事實是只要球隊贏波，費托入波與否也不重要。」衣句說話，並唔係話費托對球隊並不太重要，而背後意思其實係希望費托入球後，能夠打破心理障礙，唔好為過去繼續憂心，亦都唔好再因為入唔到波而失去信心，講比費托知，佢係其他地方都很有貢獻，只要幫到球隊贏波就得，幫入左波既費托再一步減壓，如此周到既領隊，何處尋？
沒有留言:
張貼留言