波斯王子。比真歷？

      ？？？搞乜鬼？綠茵球場花生友入面點會出現 Prince of Persia 既野架？因為真係純粹搞鬼。如果你地玩過波斯王子系列，又或者睇過《波斯王子‧時之砂》依套好戲，都一定對王子拎住把尖刀利刃，殺退一眾敵人既畫面，感到非常爽快。今次，耳冬要講既，並唔係波斯既尖刀，而係波斯尼亞 (Bosnia)既利刃球員－－比真歷 (Miralem Pjanic)。

      左邊果幅，唔識佢既人可能以為佢係法比仔；不過，除左個樣相似，比真歷既創造力真係未必差法比很遠！佢出生係1990年4月2日，只不過22歲，但佢早三至四年，已經係 FM妖人 (Football Manager 入面潛力極高的球員)，當然佢當年仲係踼法甲既班霸里昂添啦！最記得佢當年既代表作，就係歐聯淘汰皇家馬德里果場波，攻入致勝既一球。係上年夏天既轉會窗，以1100萬歐元既轉會費，轉戰意大利甲組足球聯賽，大家睇下以下依一段片：

Miralem Pjanic - Prince Of Rome™ - HD

      睇完段片，唔知大家有咩感覺呢？我就覺得比真歷係一個前途無限既球員，無論係傳球既創造力、跑動既多少、入楔既時間都做得好好，最剎食既係佢既盤球功夫，以及佢埋門一腳既把握同遠射腳頭，個人認為，都係世界級既水準。

      多年黎，羅馬一直只有羅馬王子托迪，新羅馬王子阿古蘭尼又由羅馬出走左去利記，依加仲做埋競爭對手祖雲達斯既球員。但係比真歷既加盟，就令球迷做左依段新片，都係以「羅馬王子」命名，唔知依位「波斯王子」能唔能夠成為紅狼迷心目中新一代既「羅馬王子」呢？我耳東就對此非常支持喇！

      今次突然插入比真歷既文章，純屬係個人對佢既鐘情，好想寫下關於佢既野。下一次，耳東將會回歸故土，同大家講下英倫既事，可能會有英冠英甲既野架！