今次要講既重點並唔係衣樣，而係上圖既迪馬堤奧。唔係馬後炮，當日係韋拿斯保亞斯上任之前，安察洛堤下課之後，筆者已經希望迪馬堤奧上任，果陣佢都係西布朗食飽魷魚冇耐，但係佢既玉光已經係當時稍稍顯露左出黎。
上年既西布朗，同樣好似之前講既史雲斯咁，係一隊升班馬。筆者打FM2010 (Football Manager 2010)果陣幾鐘意用衣隊波，隊中既 Ishmael Miller(伊斯梅米拿)、Joe Mattock(祖爾麥托克)，都係質數唔錯既球員，因此佢地升左上黎英超，筆者都多加留意。當時，我就發現，原來西布朗既主帥就曾經係車路士既球員，亦都係意大利國腳級既人材，就對佢頗感興趣。
西布朗係2008年球季，由英超降班至英冠。在09年賽季，聘用迪馬堤奧任主帥，旋即重返英超。係2010年賽季初期，西布朗曾經驚艷一時，最令我印象深刻既係曼徹斯特球場迫和榜首球隊曼聯2-2的一役，以及係酋長球場以2-3作客擊潰兵工廠，兩者都係當時既代表之作。其中兩場比賽入面，最令我印象深刻既係其中一點戰術部處，並唔係之前推崇既史雲斯果種控球在腳既巴塞式踼法，佢地以防守反擊為主，不過每一次攻擊既組成，都係球員既互相配合，西布朗兩側既球員，左邊係 Jerome Thomas(謝路美湯馬士)，右邊係 Somen Tchoyi(迪賽爾)/James Morrison(占士摩利臣)，都係一些技術、速度不俗既球員，具有一定既盤球、突破能力，最重要既係，佢地每次既引球推進，即使推向底線，每每中場或兩閘的球員都會積極現位幫忙，明確啲講，係每一次西布朗球員控球在腳既時候，都總有兩個人係圍住個波踼，以個人技術加相互走動去護波，以保持控球，再策劃成為攻勢。雖然衣一點只不過係好機本既足球意識，但往往好多球隊就唔能夠貫徹，以至出現一人足球、不斷橫傳等等惡性問題，即係每個球員既機動性不足，未能相互配合、走位。
保亞斯上任之後，成績一直未見好，球隊既內部問題就越黎越多，好似安歷卡、亞歷斯停車場禁用事件，上圖(中間)林柏特不滿保亞斯調動的問題等等，主要既問題可以歸結為將帥不和，年少氣盛既保亞斯主張換血，行鐵腕政策棄用一班在更衣室有一定發言權的球員，令到球隊內部氣氛很差，球員人心惶惶，戰術更加唔能夠實行。
雖然好多人都話要比多D 時間保亞斯，但筆者當時並唔係咁認為。首先，將帥不和就根本無辦法令球隊繼續運行落去，第二，佢既臨場調動的確有問題，我記得一月份對陣韋根既一場波，初期球隊打得頗為流暢，係史杜列治為車仔攻入第一球既時候，理應繼續咬住個勢，拎多球做保障，誰知保亞斯旋即以防中米基爾換入馬達，決心守住戰果，令到控球時間大減，最終久守之下，88分鐘被主隊球員祖迪高美斯扳平，當時真係對保亞斯心淡。
迪馬堤奧上任之後，完完全全係接收一個爛攤子，足總杯重賽，歐聯落後拿玻里3-1，實在難以想像如何改變困局。重要既係，迪馬堤奧一直係保亞斯既副手，會唔會分別不大呢？我從2-0擊敗伯記、4-1反勝拿玻里，得出既結論係，保亞斯很可能一意孤行，迪馬堤奧做副手果陣根本影響唔到佢。
係近期4連勝既賽事入面，重新睇番一隊光明既車路士，迪帥換人既效率同合理性都好高，好似對史篤城既一場波，由於對方既富拿被逐，但車仔搵唔到突破口入波既時候，佢敢係3X 分鐘換入馬達，最終杜奧巴接應馬達妙傳以1-0取勝。最重要既係，3X分鐘被換走既美利拉斯並無明顯不滿迪帥，係之後既比賽，都一樣有正選機會，仲好用心踼，好似對伯記果場，美利拉斯就入左球世界波，可以見到，迪帥能夠同球員打成一片！
衣點並唔係耳冬亂吹亂講的，係迪帥代表作，反勝拿玻里果場波，竟然出現上圖境況！！！佢仲擁抱左泰利、林伯、托利斯等等球員，體現到佢同球員既和諧關係。
那九個月，一直活在保亞斯身影下既迪帥，可謂潛龍勿用，如今已見龍在田，取得4連勝，包括一場硬仗，兩項杯賽都撥亂反正，就睇下迪帥執教車路士，能唔能夠飛龍在天，成就藍色的光，大家記得睇下黎緊車路士對曼城既大戰喇！！！下一次，耳冬會再同大家講講車仔既費托－－費王子！！！
沒有留言:
張貼留言